تشارلى تشارلى

نظرات عنيه كانت كلها سخرية واستهزاء، وكلماته الغريبة كانت دليل قاطع إن الشخص ده إما متخلف عقليًا أو عايش على كوكب تاني، أو يمكن لسة صاحي من غيبوبة وقع فيها لأكتر من تلاتين سنة، شرحتله كل ظروفي اللي هو كان عارفها من قبل ما أجي، بس هو كان مريض، مريض بمرض مصاب بيه شريحة كبيرة من كبار السِن اللي شايفين شباب اليومين دول مش بتوع شغل، وإنهم أهل للمسؤولية وقدروا يكونوا حياتم لأنهم أكثر اجتهادًا..

وبعد صمت طويل اتكلم وقال:

ـ يا محمود يابني أنا مش هعترض على مبلغ الشبكة، بس حاول تجيب شقة في مكان أحسن شوية لأن الشقة دي صغيرة خالص..

بصتله باستغراب واتكلمت بصوت حاولت إنه يكون أقل عصبية وقلت:

ـ يعني حضرتك تفتكر هجيب منين ٣٠٠ ألف جنيه عشان اشتري شقة تانية..

ـ ممكن تبيع دي وتكمل عليها..

ـ هبيع شقة في بيت أبويا وأدخل ناس غريبة على أخواتي البنات بقا ده كلام يا عمي!!

مقتنعش، وشايف إني لازم أجتهد وأسعى شوية لو شاري بنته، معرفش أيه علاقة الشراء بالطلبات التعجيزية دي، دنا محوش ٥٠ ألف بعد شغل أربع سنين ويادوب هجيب شبكة بـ ١٠ آلاف والباقي هجيب بيه الباقي من عفش الشقة، وده عمال يتشرط ويتكلم في أمور كأننا عايشين في مدينة الأثرياء، بيتكلم عن الـ ١٠٠ ألف كأنهم بييجوا بالشغل لمدة يوم أو اتنين، وبعد شد وجذب وحِدة في الحوار طلع معندوش كمان ذوق في معاملة الضيف، حتى مرفضنيش في التليفون، ورفضني من أول مقابلة، مع إن هو نفس الأب اللي كلمته في التليفون ورحب بيا جدًا وقالي ميهمكش أي حاجة وتعالى..

هو ليه الناس بتحب الكيل بمكيالين، ليه الناس عندها نقص في شخصياتهم، من أمتا بقينا بنقيس الناس على أد فلوسهم، ومن أمتا أصحاب البيوت الشبعانة بقوا جعانين أوي، ببساطة كدا تقدر تقول إني اتكسرت، شخص حساس وطول عمره بيتعامل مع الدنيا بقلب أبيض، مبيعرفش يتلون ولا ينافق، مبيعرفش يشوف الناس غير كويسين، وبعد ليلة من التفكير وكسرة النفس سبت شغلي تاني يوم بس، وده كان بعد إرهاق جسدي ونفسي كان هيجبلي أمراض الدنيا كلها..

إدارة فاشلة عشان زميلي له قريب فيهم فمكنش حد بيلومه، وأنا اللي بشتغل يوميًا لأكتر من ١٢ ساعة ومع أول مشكلة نصفوه عليا، رغم إنه كان أفعى عايشة على الأرض، عارف ازاي يتصدر المشهد بعد أي إنجاز في الشغل، وعارف ازاي يمارس دور الضحية رغم إن أسلوب شغله كان كله غلط في غلط، وأنا اللي ياما اتحملت وسهرت وضحيت مكنش ليا أي قيمة، ومع أول شكوى مني بعد مدح سنين محدش وقف معايا..