ساحر الضريح

من وأنا صغيرة وعندنا عادة شهرية ثابتة ومقدسة تقديس رهيب من أمي، كنا يوم ١٥ في الشهر لازم نزور ضريح الشيخ بركة ونصلي هناك وندعي ونتصدق على المساكين اللي هناك وبعدها نرجع للبيت، عادة استمرت لمدة سنين طويلة، ويا ويل اللي كان يرفض يروح مني أنا وأخواتي، كانت أمي بتضــ,,ـــــربه لحد ما تكــ,,ـــــسر عضمه وتفضل تردد:

ـ عاوزين تحرمونا من بركة الشيخ بركة يا ولاد الـ……….

وفضلنا على الحال ده كتير أوي لحد ما كبرت ونوعًا ما بدأت أشوف ده موروث فاسد وكله دجل وفساد كبير، وبدأت أعارض أمي في كل زيارة باستماتة، لدرجة إن أمي قاطعتني شهر كامل عشان مروحتش معاها مرة، بس مع إصراري ومع سنها اللي كبر مبقتش بتعرف تجبرني إني أروح للضريح تاني، وكانت دايمًا مبسوطة من أختي الكبيرة اللي كانت بتقدس العادة دي زي أمي، بل وكانت قبل الزيارة بيوم بيصرفوا ثروة ويعملوا وليمة كبيرة للناس هناك، عشان البركة طبعًا..

و الأسوأ كمان إني عرفت إن جدتي كانت برضه بتقدس العادة دي اللي خدتها من أمها، سلسال طويل من موروث غريب مكنتش مقتنعة بيه إطلاقًا، وكبرت أكتر وبدأت الدنيا تاخدني من ناحية الدجل ده، لحد ما جالي عريس كويس وكنت مبسوطة جدًا لأنه هيخرجني من وسط البيت اللي بيقدس الخرافات دي..

وطبعًا أمي من يوم الخطوبة بدأت تلح عليا عشان أزور الضريح واخد البركة عشان جوازي يتسهل والدنيا تكمل، وكنت لسة على إصراري وشايفة إن كل ده مالوش أي لازمة إطلاقًا، وكملت خطوبتي لحد ما اتجوزت ومشيت من البيت كله..

كنت متجوزة في نفس المنطقة بس كنت مبسوطة إني خرجت من المحيط المعتوه ده، ومع ذلك كنت ببر أمي ومحافظة على صِلة الرحم، وكمل جوازي لمدة شهر واحد بس وبعدها بدأت الأمور تاخد منحنى غريب أوي..

ليلتها شوفت في الحلم إن فيه تعبان أسود ضخم بيزحف على السرير بتاعي، صحيت مخضوضة من النوم وبدأت أطمن نفسي إنه مجرد كابــ,,ـــــوس وهيروح لحاله، بس للأسف مكنش مجرد كابــ,,ـــــوس، لأن حالتي الصحية بدأت تتدهور بطريقة غريبة..

والأسوأ إن التعبان ده مبقاش ظهوره في الحلم وبس، جوزي لما كان بس بيفكر يقرب مني كنت بلمح التعبان على السرير وبيبص ناحيتي بعيون دموية، وطبعًا كنت بصرخ واتنفض وكان بيفشل الموضوع تمامًا، ومع كثرة المحاولات الفاشلة بدأ جوزي يمل مني ويزهد فيا، بل وبدأت المشاكل تكتر ما بينا لأتفه الأسباب..