كنت متجوز في السر

هفاجئه بحاجة عمره ما كان عامل حسابها.
يوم الجلسة.. رحت المحكمة.. لابسة بدلة سودا وشكلي محاسبة بجد.. مش الست اللي كانت لابسة دبلة في سلسلة ومستخبية.. وهو جيه.. لابس بدلة برضه.. بس بدلة قديمة مش المتفصلة اللي كان بيلبسها وهو شريك.. وخاسس النص.. ودقنه طويلة.. ومعاه محامي صغير شكله لسه متخرج.. عشان مفيش مكتب كبير راضي يمسك قضيته بعد فضيحة السرقة. أول ما شافني.. عينه لمعت.. جيه ناحيتي وقال لي بصوت واطي انتي لسه حلوة زي ما انتي.. ارجعي لي وهنسى كل حاجة.. هنسى انك بلغتي عني.. وهنسى انك دمرتي شغلي.. ونبدأ من جديد.. أنا لسه بحبك. بصيت له وقلت له انت بتحب نفسك بس.. ولو كنت بتحبني.. مكنتش قلت عليا المساعدة بتاعتك قدام الست الحامل.
دخلنا القاعة.. القاضي نده القضية.. المحامي بتاعه قام وقال موكلتي.. قصدي موكلي.. اتعرض للتشهير من طليقته.. اللي زورت أوراق بنكية تتهمه انه بيسرق عملاءه.. وده دمر سمعته وخسره شغله.. واحنا بنطالب بتعويض مليون جنيه. القاضي بص لي.. قال عندك رد؟ قمت.. وقلت سيادة القاضي.. أنا محاسبة قانونية.. وده تخصصي.. كشف التزوير.. مش عمل التزوير.. والورق اللي أنا قدمته لمجلس التأديب وللعميل.. مش أنا اللي مزوراه.. ده كشف حساب رسمي من البنك.. ومختوم من البنك.. ولو سيادة القاضي عايز.. أنا معايا طلب.. أطلب كشف حساب رسمي من البنك لحساب الأستاذ.. حسابه الشخصي.. وحساب الست اللي كانت حامل.. ونشوف التحويلات دي جت منين وراحت فين.
القاضي قال موافق.. هنطلب كشف حساب. وش طليقي اتخطف.. المحامي بتاعه قال لا يا فندم.. احنا مش عايزين كشف حساب.. احنا عايزين نثبت انها شهرت بيه. القاضي قال له لو عايز تثبت انها شهرت بيه.. لازم تثبت ان الورق مزور.. ولو الورق مش مزور.. يبقى مش تشهير.. يبقى بلاغ حقيقي.. ولو بلاغ حقيقي.. يبقى انت اللي هتتحول نيابة. ساعتها المحامي بتاعه سكت. والقاضي طلب من البنك كشف حساب.. والجلسة اتأجلت شهر.
خرجت من المحكمة.. وهو خرج ورايا.. قال لي انتي عايزة تسجنيني بجد؟ قلت له أنا مش عايزة أسجنك.. انت اللي عايز تسجن نفسك.. انت اللي رفعت قضية تشهير وانت عارف انك حرامي.. انت مفكر اني هخاف وهرجع لك وأقول لك خلاص هتنازل؟.. لا.. أنا مش هتنازل.. ولو البنك طلع انك سارق.. انت اللي هتتسجن.. مش أنا. قال لي طب والبيبي؟.. ابني اللي لسه مولود.. عايزة أبوه يتسجن؟ قلت له ابنك؟.. انت فاكر ان الست الحامل لسه مراتك؟.. دي رافعة عليك قضية نسب ومش عايزة تشوف وشك.. وبتقول للناس كلها انك ضحكت عليها وقلت لها انك أعزب.. زي ما ضحكت عليا وقلت لي استني لحد ما أبقى شريك.. انت ضحكت علينا احنا الاتنين.. والبيبي ده ملوش ذنب.. ذنبه ان أبوه كداب.
مشي وهو بيعيط.. أول مرة أشوفه بيعيط.. الراجل اللي كان بيقول لي متعمليش فضيحة في مكتبه.. واقف بيعيط في طرقة المحكمة. بعد شهر.. البنك بعت كشف الحساب للمحكمة.. والتحويلات كلها طلعت حقيقية.. 27 تحويل.. كل تحويل ب 2000 و 3000 دولار.. من حساب العميل لحسابه هو.. ومن حسابه لحساب الست الحامل.. بإجمالي 78 ألف دولار.. سرقهم في سنة ونص. القاضي حكم ببراءتي من تهمة التشهير.. وحول هو للنيابة بتهمة اختلاس وخيانة أمانة.
يومها.. الست الحامل.. اللي بقت أم.. جت لحد مكتبي.. ومعاها البيبي.. ولد صغير عنده شهرين. دخلت وقالت لي أنا عارفة انك مش طايقاني.. وعارفة انك شايفاني الست اللي خدت جوزك.. بس أنا والله مكنتش أعرف انه متجوزك.. هو قال لي انه أعزب وعمره ما اتجوز.. وأنا صدقته.. ولما انتي بعت لي قسيمة جوازك.. عرفت انه كداب.. وأنا سبتة في نفس اليوم. قلت لها أنا مش شايفاكي خدتي جوزي.. أنا شايفاكي ضحية زيه زيي.. هو ضحك علينا احنا الاتنين. قالت لي أنا جاية أطلب منك طلب.. أنا عارفة انك محاسبة شاطرة.. وأنا رافعة عليه قضية نفقة للواد.. بس هو بيقول انه مفلس ومش معاه فلوس.. وانتي الوحيدة اللي تعرفي هو مخبي فلوسه فين.. ممكن تساعديني؟.. عشان الواد.. مش عشاني.
بصيت للواد.. كان نايم في الكارسيت.. شبهه بالظبط.. نفس المناخير ونفس البق. قلت لها هساعدك.. مش عشان هو أبوه.. عشان انتي ملكيش ذنب.. والواد ملوش ذنب. فتحت اللاب توب بتاعي.. وطلعت الفلاشة القديمة.. ووريتها حساب تاني.. حساب باسمه في بنك برا.. كان محول عليه 40 ألف دولار من الفلوس اللي سرقها.. ومخبيه عشان محدش يلاقيه. قلت لها ادي ده للمحامية بتاعتك.. وقولي لها تطلب من المحكمة الحجز على الحساب ده.. وهتاخدي نفقتك ونفقة الواد.
عيطت.. وقالت لي ليه بتساعديني بعد كل اللي حصل؟ قلت لها عشان أنا اتوجعت من راجل.. ومش عايزة ست تانية تتوجع بسببه.. وعشان لما كنت واقفة في مكتبه شايلة الغدا وهو بيقول عليا المساعدة.. كنت أتمنى الاقي ست تقف جنبي وتقول لي انتي مش مساعدة.. انتي مراته..
بعدها بكم شهر.. اتحكم عليه.. سنة مع إيقاف التنفيذ.. ورد الفلوس للعميل.. ودفع نفقة للواد.. واتشطب من نقابة المحامين خالص. سمعت انه ساب البلد.. وراح محافظة تانية بعيدة.. وفتح كشك تصوير مستندات جنب محكمة صغيرة.. من محامي كبير
لابس بدلة متفصلة.. لصاحب كشك بيصور ورق بجنيه.
وأنا؟.. مكتبي كبر.. وبقى عندي 3 موظفين.. وبقيت معروفة اني المحاسبة اللي بتجيب حق الستات اللي أزواجها بيسرقوهم أو بيخبوهم.. وبقيت بعلق في مكتبي جملة جديدة جنب قسيمة الجواز وورقة الطلاق. كنت فاكرة ان بطني الفاضية هي اللي وجعتني لما سمعت حفلة البيبي.. بس اللي وجعني بجد اني كنت فاكرة اني مساعدة.. وأنا كنت صاحبة البيت.. وصاحبة المكتب.. وصاحبة الحق.
وكل مرة ست تدخل مكتبي تقول لي أنا حامل وجوزي بيقول عليا مساعدة.. ببص لبطني.. وبفتكر بطني الفاضية يومها في مكتب المحاماة.. وبقول لها متقلقيش.. بطنك هتتملي.. وحقك هيرجع.. واللي قال عليكي مساعدة.. هييجي يوم ويتمنى يبقى هو المساعد بتاعك.