حصاد الغدر٢

لمحة نيوز

أول ما شافت الملاية، رفعت حاجبها وقالت باستهزاء حتى ملايات جهازي يا حاجة فتحية؟ رخيصة للدرجة دي؟ فتحية وشها احمر ونزلت الملاية على الأرض من غير ما تنطق، وزقت الشنط لقدام. أحمد وقف قدامهم وقال بصرامة افتح الشنط دي يا طارق. طارق صړخ پقهر جرى إيه يا أحمد؟! هدومي كمان هتفتشوها؟ إيه الإهانة دي! أحمد بصله من غير ما يرمش اللي مد إيده في حساب بنكي مش بتاعه وسرق ربع مليون جنيه، ما يتأمنش على دهب أخته ولا أوراق بنته. افتح الشنطة بدل ما أفتحها أنا بطريقتي.
طارق قعد على ركبه في الأرض بإذلال تام، فتح السوستة بتاعة الشنطة الكبيرة. أحمد قلب في الهدوم بسرعة، ومصطفى فتش شنط فتحية. طلعوا منها علبة برفان غالية كانت بتاعة نيرة، وساعة يد فضة كانت هدية من والدها، رموهم على الترابيزة من غير كلام، وطارق باصص في الأرض وعينيه مفيهاش ذرة كرامة باقية.
الأستاذ وحيد وقف وطلع إيصال أمانة على بياض، ومعاه ورقة تانية مطبوعة أستاذ طارق، الفلوس اللي اتسحبت دي هتترد في خلال ست شهور، كل شهر تدفع قسط في البنك في حساب نيرة، وهتمضي هنا على التعهد ده وإيصال الأمانة ده كضمان، مع التنازل التام عن أي حقوق أو ادعاءات في الشقة دي، وقضية الطلاق للضرر هتترفع في ميعادها وتتنازل عن حضانة البنات بدون

شوشرة، وإلا محضر السړقة جاهز يتسلم للنيابة العصر.
طارق مسك القلم بإيد بتترعش، بص لأمه اللي شاحت بوشها بعيد كأنها متعرفوش، وبص لنيرة اللي كانت بتبصله بجمود كأنه چثة هامدة مفيش فيها روح. مضى على الورق، وبصم عليه بإبهامه، ورما القلم على الترابيزة.
الحاج عبد الحميد شاور على باب الشقة المفتوح مع السلامة… والباب اللي يتقفل وراكم ميفتحوش غير اللي يستاهل يعتب عتبته.
طارق سحب شنطته، وأمه مشيت وراه تسب وټلعن تحت سنانها، وأول ما نزلوا على السلم، أحمد رزع باب الشقة وراهم رقعة سمعت في العمارة كلها، ولف المفتاح تكتين.
نيرة غمضت عينيها، وحست براحة مفيش بعدها راحة، كأن هواء نقي دخل صدرها لأول مرة من سنين. فجأة، من الأوضة التانية، طلع صوت بكاء التوأم الصغيرين، فريدة وجميلة صحيوا من الدوشة وجعانين. نيرة قامت وقفت براحة، وبصت لأبوها وإخواتها بابتسامة حقيقية البنات صحيوا… هروح أرضعهم، والحمد لله إنهم صحيوا على نضافة.
دخلت الأوضة وشالت فريدة وبدأت ترضعها، وأحمد ومصطفى دخلوا المطبخ. مصطفى بص للتلاجة الجديدة اللي لسه واقفة بنصبتها، وبص لأحمد هنعمل إيه في التلاجة دي يا أحمد؟ نيرة مش هتطيق تبص في وشها بعد اللي حصل. أحمد ابتسم بمكر التلاجة دي مدفوع تمنها من ډم نيرة، يعني حلال عليها وعلى بناتها… بس عشان نرد الإهانة صح، التلاجة دي هتتنزل المعرض بتاع الأجهزة المستعملة العصر وتتباع، وفلوسها هتتحط وديعة باسم فريدة وجميلة في البنك، وتلاجة نيرة القديمة هتملاها لحمة وفاكهة وخير لحد ما تفيض، عشان يعرفوا إن بيت عبد الحميد بناته ميتذلوش بلقمة.
في الشارع تحت، كان طارق واقف جنب تاكسي، أمه ركبت من ورا وهي بتولول وبتلطم على حظها، وهو واقف يرمي الشنطة في الشنطة وبيبص لفوق على بلكونة الدور التالت. الشيش كان مقفول، والشمس طالعة بتنور الشارع، بس جواه كان ضلمة عميا. تليفونه رن في جيبه… كان رقم مديره في شركة المقاولات! طارق رد بصوت مبحوح ألو… أيوة يا باشمهندس؟ صوت المدير كان عصبي وجاف أنت فين يا طارق؟ مجيتش الشغل ليه؟ وفي