دوون حب
هزيت راسي بتعب فقالتلي الست بحنان: جعانة يا بنتي تأكلي؟
بصيت لها بكسوف وقولت: ياريت أنا مأكلتش من الصبح…
… كان لؤي وجلال بيبصوا علي تسجيلات الكاميرا وشافوا ايهاب وهو شايل نسرين وبيهرب بيها من الباب الخلفي للفيلا واللي مكانش عليه حراسة…
مين ده… ده مش شغال عندي ومشوفتهوش قبل كده!!!
بص جلال لطاقم الشغالين عنده وصرخ: مين ده… انطقوا تعرفوه وازاي دخل فيلتي.. ده خطف مرات شريكي…
بلع حسن ريقه وقال: ده صاحبي من ايام الدراسة والله يا باشا انا مليش دعوة، هو طلب شغل وبما أن كان فيه حفلة كبيرة وعجز في اللي بيضايفوا الناس جبته يسترزق…
… قالتها انعام لابنها ايهاب فقال ايهاب: يا امي حرام عليكي انام برا ازاي بس…
قرصته في ايده وقالت: عايز تنام في البيت وفيه ستات هنا… انت ايه معندكش دم ولا احـ…. بسم الله ما شاء الله ايه الجمال ده بس.. قالتها ام ايهاب فاتكسفت… كنت لابسة العباية بتاعتها… كانت عباية جديدة صحيح موديلها قديم شوية بس عجبتني وكانت بالنسبالي احسن من الفستان البراند اللي كنت لابساه….
ايهاب بص علي الارض وقال: انا رايح انام علي الكنبة برا…. وبعدين طلع…
بصيت علي مامته بإحراج وقولت: انا اسفة كركبت حياتكم شوية…
مسكت الست انعام أيدي وقالت: متقوليش كده يا بنتي الناس للناس، يمكن رحمة ربنا بيكي خلتك تقابلينا عشان ترجعي لأهلك… اشكري ربنا اللي انقذك احنا مجرد عباد بنفذ أوامره….
ابتسمت وقعدت علي السرير اللي في الصالة… تفتكري اهلي هيرضوا يساعدوني بعد ما وقفت في وشهم عشانه!
قعدت جمبي وطبطبت عليا وقالت: اكيد يا بنتي مليون في المية هيساعدوكي… يا حبيبتي الأهل عمرهم ما يتخلوا عن عيالهم… اهلك الوحيدين اللي هيقفوا جمبك في اي مشكلة… واعرفي أن اهلك دايماً علي حق… احنا الأهل بنحس بعيالنا وبنعرف ايه الصالح ليهم، صدقيني انتي هتشوفي ده تجبر منهم لكن مش كده خالص… احساس الام والاب ميكدبش ابدا… بتقولي أن جوزك كان شريك ابوكي يعني ابوكي كان يعرفه كويس مش مجرد واحد جه اتقدم واترفض.. ابوكي اكيد عنده سبب يرفضه صح!
هزيت راسي بأسف وافتكرت بابا لما حاول يقنعني أنه مش مناسب وانه مش كويس ورغم أنه كان هيخسر بس فضا الشراكة معاه لما شاف أنه لف عليا، لكن أنا كنت معمية بحلاوة الحب.. مقدرتش افكر بعقلي وده اللي وداني في داهية، فبعد شهرين جواز ودلع منه عرفت حقيقته… عرفت أن اللي متجوزاه ده مش راجل ولا يمت بالرجولة بحاجة….
