عيادة الأسنان

امبارح جالي مريض عيادة الأسنان بتاعتي وكان شكله غريب لدرجة خلت كل المرضى يهابوا منه ويبعدوا عنه، حتى البنت اللي شغالة معايا دخلت أوضة الكشف، وقالتلي وهي خايفة:

ـ يا دكتورة فيه واحد برا عايز يكشف وشكله غريب أوي..

سألتها بتعجب:

ـ يعني أيه غريب يا فرح؟!

ردت وقالت:

ـ شكله مش مُريح والمرضى متوترين برة وممكن يمشوا..

فكرت لحظة وبعدها طلبت منها تدخله عليا بسرعة، أخلص منه بدري بدري طالما هيطفش العيانيين من العيادة، وفعلًا دخل الراجل عليا وخرجت فرح وكأنها بتهرب من سفاح، فعلًا كان شكله مُخيف ويوتر جدًا، عنيه مبرقة بطريقة مُبالغ فيها، ريحته مش كويسة خالص، ولبسه مبهدل جدًا وشعره منكوش، اتغلبت على التوتر اللي جوايا وابتسمت وقولتله:

ـ أهلًا وسهلًا اتفضل..

دخل وقعد بكل هدوء على الكرسي الخاص بالمرضى، سألته هو بيشتكي من أيه بس مردش عليا، كل اللي عمله إنه فتح بقه على الآخر وقال بصوت خشن أوي:

ـ عايزة أنضف الطينة اللي جوة..

مفهمتش الكلام، طين أيه اللي هيدخل في أسنان حد، قربت منه عشان أعمل كشف عادي واشمئزيت من ريحة أسنانه، ريحة بشعة لا تُطاق، لدرجة إني كنت هرجع اللي في بطني، لبست كمامة وبالعافية بدأت أتفحص أسنانه، وفعلًا كان فيه سواد غريب، زي مادة سودة بين الضروس وجوة الضروس، تحسست المادة دي، لقتها عاملة زي اللحم، حاجة مُقرفة فوق ما تتخيل..

بدأت أشتغل في أسنانه وأنا بنازع من الريحة مع خوفي إني أرفض يعمل فيا حاجة لحد ما قدرت أنضف منها كتير أوي، وبدأت فعلًا أدوخ من الريحة والمنظر ونهيت الجلسة وقولتله نكمل مرة تانية وأنت خلاص بقت كل حاجة تعتبر تمام أحنا نضفنا تسعين في المية من اللي في أسنانك..

وخرج الراجل ورشيت معطر في العيادة واندمجت مع شغلي عشان أنسى الراجل وشكله الغريب ده، وعلى آخر اليوم روحت البيت مهدودة وكأني واكلة علقة موت، ونمت، نمت بهدومي بدون حتى ما أغير، وشوفت حلم، حلم من أغرب الأحلام اللي ممكن إنسان يشوفها، حلمت إني في العيادة وقاعدة بنضف أسنان الراجل، بس كل ما كنت بشيل الرواسب السودة كنت بسمع صوت حد بيتألم..

الصوت كان بيخرج من جوة الراجل نفسه، كأنه بيتكلم من بطنه، وصحيت من نومي قلبي بيدق بهيستريا، بصيت قدام سريري ولمحت واحدة شعرها طويل وطلعت تجري في لمح البصر لبرا الأوضة، قومت وأنا مفزوعة وطلعت السلاح المُرخص ولفيت الشقة كلها، بس كل حاجة كانت طبيعية، مفيش أي حاجة إطلاقًا، فاستعذت بالله واتوضيت وصليت ركعتين وعدت الليلة عادي جدًا..