مستر العربى
لفت وشها ببطء وقلبها هيقف، هو، ريان واقف قدامها لابس قميص ابيض وبنطلون كحلي ونظارة نظر مدياه وقار، بقى اطول واعرض وشكله بقى راجل بجد مش الواد اللي كانت تعرفه، وهو كمان اول ما شافها اتسمر مكانه والكلام راح من لسانه، فضل باصص لها وللواد الصغير اللي ماسك ايدها، فاروق اللي شبهه بالظبط.
المديرة خدت بالها من التوتر اللي حصل فجأة وقالت مالكم يا جماعة تعرفوا بعض ولا ايه، نور بلعت ريقها وقالت لا ابدا تشابه اسماء بس، ريان سكت ومردش ودخل الفصل ووراه العيال ونور فضلت واقفة بره مش قادرة تتحرك، شهد كانت معاها ومسكت ايدها وقالت لها اهدي يا نور مش معقول هو، هو سافر من عشر سنين واكيد مش هيرجع يبقى مدرس هنا، نور قالت لها هو، والله هو، وده ابنه، فاروق شبهه بالميلي.
اليوم عدى ونور مش فاكرة منه حاجة، روحت البيت وهي حاسة ان الدنيا بتلف بيها، طول الليل فاروق بيحكي عن المستر الجديد اللي بيحبه وبيقول عليه شاطر وطيب، وهي كل كلمة كانت سكينة في قلبها، تاني يوم وهي بتوصله المدرسة لقت ريان مستنيها عند البوابة، قال لها لازم نتكلم، قالت له نتكلم في ايه بعد عشر سنين، بعد ما سبتني ومشيت من غير حتى كلمة، قال لها انا مسبتكيش بمزاجي، كان غصب عني، قالت له غصب عنك عشر سنين متسألش حتى انا عايشة ولا ميتة.
ريان قال لها انا كنت هموت لو مسألتش بس كان لازم ابعد، نور قالت له كان لازم تبعد وتسيبني حامل لوحدي اواجه الدنيا كلها، ريان اتصدم وقال لها حامل ايه، انتي بتقولي ايه، نور سكتت وعرفت انها زلت لسانها، قالت له ملكش دعوة، قال لها فاروق ده ابني صح، ده ابني انا، نور عينيها دمعت وقالت له لا مش ابنك، ده ابني انا لوحدي، انا اللي ربيته وانا اللي سهرت عليه وانا اللي استحملت كلام الناس عشانه، انت ملكش حق تسأل عنه دلوقتي.
ريان مسك راسه وقال لها يا نهار اسود، يعني انا عندي ابن وانا معرفش، يعني انا ضيعت عمري كله بعيد عنكم، نور قالت له انت اللي ضيعته بمزاجك، انت اللي اخترت تمشي، وسابته ومشيت وهي بتعيط.
بالليل ريان راح لبيت فتحي صاحبه القديم اللي لسه ساكن في نفس المنطقة، فتحي اول ما شافه حضنه وقال له يا راجل فينك من عشر سنين، قعدوا يحكوا وريان حكى له كل حاجة، قال له ان ابوه كان عليه ديون لناس كبيرة اوي في اسكندرية وكانوا مهددينه بالقت*ل، وفي يوم جم خدوه وضربوه وقالوا له يا الدفع يا هناخد ابنك، ابوه خاف عليه وقرر يهربه بره مصر خالص عند قريبه في ليبيا ومنها سافر على ايطاليا، ومكانش ينفع يقول لنور عشان الناس دي كانت مراقبة كل حاجة ولو عرفوا ان له حد بيحبه كانوا هيأذوها هي كمان، فابوه اخد منه التليفون ومنعه يكلم اي حد وقال له انساها عشان تحميها.
