طـ.ـمع تحت سقف بيتى٢
نسمة دخلت تجري ورمت نفسها على السرير الكبير بالروب بتاعها وضحكت بصوت عالي الله! الأوضة دي ملكي من النهاردة، مش هطلع منها أبداً!
قفلت الموبايل وإيدي بتترعش من الثبات الانفعالي. اتصلت بالأستاذ رفعت أستاذ رفعت.. اللحظة جت، كسروا الكالون واقتحموا الأوضة بالقوة وكل حاجة متسجلة لايف صوت وصورة. رد عليا بصوت حاسم اطلعي على قسم شبرا فوراً واعملي محضر كسر واقتحام وسرقة مسكن، وأنا هقابلك قدام القسم بالتوكيلات وعقود الملكية، وهنطلع بقوة من القسم نطب عليهم متلبسين!
طلعت على القسم زي الصاروخ. الغضب اتقلب لقوة والطاقة عمري ما حسيت بيها في حياتي. عملت البلاغ، والأستاذ رفعت جاب كل الأوراق
الرسمية اللي تثبت إن الشقة ملكي الخالص، وفيديوهات الكاميرا كانت كافية تخلي رئيس المباحث يدي أمر فوري بنزول أمين شرطة
وقوة معاينة عشان يثبتوا حالة التلبس والكسر.
في نفس الوقت، اتصلت بإسلام وقولتله بصوت هادي ومصطنع الرعب إسلام.. الحقني، أنا رجعت البيت نسيت ورق مهم، ولقيت باب الأوضة مكسور والبيت مقلوب، تعالى بسرعة عشان البيت بيتسرق!
طبعاً إسلام اتخض وجه يجري، وهو فاكر إنه هييجي يلاقيني بنهار قدام أمه وأخوه ويفرض سيطرته عليا.
وصلت قدام باب العمارة.. عربيات البوكس وقفت على أول الشارع، ونزل أمين الشرطة ومعاه اتنين عساكر وطلعوا ورايا على السلالم في هدوء تام. وقفت قدام باب الشقة.. وحطيت المفتاح في الباب، وفتحته على آخره.
المشهد جوة كان قمة في الفوضى والعنجهية.. الشنط والكراتين بتاعة إبراهيم ونسمة اتنقلت كلها جوة الأوضة الكبيرة، وحماتي نادية كانت قاعدة على كرسي الصالون في وش الباب، رافعة راسها للسما وبتشرب شاي، وإسلام كان لسه واصل وواقف جمب أمه بيضحك، وبيقولها يعني مكنش فيه لزوم الاستعجال ده يا أمي، بس يالا، أهو أمر واقع ولازم ياسمين ترضى بيه!
وفجأة.. دخلت أنا. ومن ورايا دخل الأستاذ رفعت المحامي، وأمين الشرطة بالبدلة الميري واتنين عساكر شايلين بنادقهم.
السكوت نزل على الصالة زي الصاعقة. كوباية الشاي وقعت من إيد نادية اتكسرت على الأرض والشاي السخن طرطش على رجليها ي.. يا مري! إيه ده؟! بوليس في بيتي؟! إسلام اتصدم، وشه بقى أبيض زي اللوح التلج، وجري عليا يزعق ياسمين! إيه اللي أنتِ عاملاه ده؟! جايبة الحكومة في بيتي عشان نمرة عائلية؟! اتجننتي؟!
أمين الشرطة زقه في صدره بكل حزم ارجع ورا يا جدع أنت ومسمعش صوتك! فين صاحبة الشقة؟ أنا وقفت قدامهم، ثابتة كأني جبل، شاورت على الأوضة اللي كالونها مكسور ومرمي على الأرض أنا صاحبة الشقة يا باشا، ودي عقود الملكية المسجلة، والناس دول كسروا الكالون واقتحموا الأوضة وسرقوا حاجتي واستولوا على الشقة بالقوة الجبرية، والكسر باين قدامك اهو في الحلق والباب!
