بويضة٢

في النهاية، تم الطلاق.
دفع لي كل حقوقي كاملة، واداني مؤخر الصداق ونفقتي وكل حاجة تخصني، حتى الهدايا اللي كان جايبهالي قبل الجواز سابها لي.
الغريب إن كرمه وقت الطلاق بدل ما يطمني، خلاني أحس إن فيه حاجة غلط.
كنت ببص له وهو بيعد لي حقوقي، وقلت في نفسي:
ـ هو مستعجل ليه كده؟
لكنه كان هادي جدًا، وكأنه أنهى مهمة كان مستني يخلص منها من زمان.
خرجت من بيته وأنا حاسة إني اتكسرت.
أنا اللي دخلت حياته وأنا فاكرة إني أذكى من الجميع، وأنا اللي كنت مخططة إني أبعد مراته الأولى عنه وأبقى أنا الوحيدة في حياته… خرجت أنا من حياته، ورجعت لوحدي.
مرت الأيام.
حاولت أبدأ حياتي من جديد، وأقنع نفسي إن الموضوع انتهى، لكن اسمه كان لسه موجود في دماغي.
كنت أفتكر كل كلمة قالها لي وقت الحقن المجهري.
كل مرة طمني فيها.
كل مرة قال لي فيها:
ـ الأجنة كويسة.
وكل مرة سألته فيها:
ـ إمتى هننقلها ؟وكان يرد:
ـ قريب.
مرت خمسة شهور على طلاقنا.
وفي يوم، وأنا في الشغل، سمعت زميلة بتتكلم عن الإجازات.
وبالصدفة سمعت اسم منير.
قالت:
ـ هو الدكتور منير خد إجازة كام يوم؟
ردت عليها زميلتها:
ـ آه، خد إجازة طويلة شوية… تقريبًا أسبوعين.
رفعت رأسي من على المكتب.
منير؟
إجازة؟
سألتها من غير ما أحس:
ـ إجازة إيه؟
بصت لي باستغراب:
ـ معرفش، بس شكله مسافر أو عنده ظرف عائلي.
حاولت أتجاهل الموضوع، لكن حاجة جوايا ما خلتنيش أسكت.
بعد شوية بدأت أدعبس وأسأل بشكل غير مباشر.
واحدة قالت لي إنه مش مسافر.
واحدة تانية قالت إن مراته الأولى تعبانة.
ولما سألت أكتر، وصلت للمعلومة اللي خلت الدم يتسحب من وشي.
مراته الأولى… بتولد.
فضلت ساكتة. حسيت إن وداني بتطن.
مراته الأولى بتولد؟
بعد كام شهر من طلاقي؟
بدأت أحسب في دماغي. انا قبل جوازى سالت وبحثت فى ملفها وعارفه انها استحاله تخلف ودلوقتي بعد خمسة شهور من وقت طلاقي…
والحمل أكيد كان سابق الطلاق بفترة.
رجعت البيت وأنا مش شايفة قدامي.
فتحت النتيجة القديمة بتاعة التحاليل.
أنا سليمة.هو سليم.
وبعدين افتكرت عملية سحب البويضات.
افتكرت كلامه عن الأجنة.
افتكرت يوم ما قال لي:
ـ خلاص، تمت عملية النقل.
لكن النقل كان فين؟
وقتها لأول مرة، السؤال اللي كنت بخاف أسأله لنفسي خرج قدامي بكل وضوح:
لو الأجنة اتنقلت فعلًا لرحمي…
أنا ليه ما حملتش؟
ولو العملية فشلت…مراته الأولى ليه بتولد دلوقتي؟
قعدت على طرف السرير وأنا بحاول أقنع نفسي إن مفيش علاقة.
يمكن كانت حامل من قبل.
يمكن عملت هي كمان عملية.
يمكن…