جوزى طردنى ١
بتاعة الفيلا والشركة خلاص هتدخل جيبه، هيمضي على أي ورقة وأي شرط جزائي عشان بس الصفقة الكبيرة تتم وميضيعش منه كل ده!
ضحك بابا بصوت واطي وقال
والله وبدأتي تفكري بعقل ست السوق يا ميسان! بس هند ومراته التانية وبنته؟ مش هتدخليهم في الحسبة دي؟
هند دي ليها حساب خاص عندي يا بابا… حساب هيتصفى على ڼار هادية جدًا. بس الأول، لازم أروح بنفسي أشوف البيت اللي متجوزها فيه، لازم أشوف وشها وهي فاكرة إنها خطفت الراجل وقاعدة في العز ومأمنة نفسها ومستنية اليوم اللي علي يجيب فيه أملاكي ويحطها باسمها وباسم بنتها!
وفي نفس اللحظة اللي كنت بخلص فيها كلامي، تليفوني اللي كان على السرير رن تاني فجأة بصوت عالي.
اتخضينا إحنا الاتنين، بصيت على الشاشة… كان الاسم هو هو اللي كان بيهز قلبي زمان من الفرحة، ودلوقتي بيهزه من القرف والاڼتقام
علي
بصيت لبابا، وبابا شاورلي براسه وقال بهمس
ردي… وخليكي ميسان اللي هو عارفها، المکسورة اللي ھتموت على رضاه.
أخدت نفس عميق، وبلعت ريقي، ورسمت صوت العياط في زوري، وضغطت على زرار الرد، وحطيت التليفون على ودني، وقولت بصوت بيتقطع ومهزوز
ألو… يا علي…
جالي صوته من الناحية التانية، بارد، مغرور، وفيه نبرة انتصار مستفزة جدًا
أيوة يا ميسان… ها، فكرتي كويس في الكلمتين اللي قولتهم لك، ولا لسه دماغك ناشفة ومستغنية عن بيتك وعني؟
غمضت عيني وضغطت على صوابعي بقوة لحد ما ضوافيري علمت في كف إيدي، ونزلت دمعة حقيقية بس مش دمعة حزن… دي كانت دمعة الوداع لكل لحظة غباء عشتها معاه، ورديت عليه بصوت كأني بستجديه
فكرت يا علي… فكرت ولقيت إني معرفش أعيش من غيرك، ومفيش حاجة في الدنيا دي كلها تسوى بعدك عني… أنا موافقة يا علي، موافقة أتنازلك عن كل حاجة!
ضحك علي في التليفون ضحكة عالية فيها راحة وشماتة، وقال بنبرة استعلاء
كنت عارف إنك هترجعي لعقلك في الآخر… ماهو مفيش ست عاقلة تضيع راجل زيي من إيدها عشان شوية ورق وحيطان! تمام يا ميسان، بكره الصبح هكون عندك عشان نروح الشهر العقاري ونخلص كل حاجة.
لأ يا علي… بكره متجيش عشان نروح الشهر العقاري، تعالى عشان نقعد مع بابا ونتفق، لأن فيه مشكلة كبيرة جدًا في أوراق الشركة لو مصلحناهاش إنت مش هتعرف تستلم مليم واحد من المشروع، ولا هتقدر تبيع الفيلا للحاج راضي!
السكوت خيم على الخط فجأة.
صوت نفسه وقف، ونبرة الغرور طارت في ثانية وحل مكانها ړعب حقيقي، وسألني بصوت ملهوف ومخضوض
إنتِ… إنتِ بتقولي إيه يا ميسان؟! عرفتي الحاج راضي منين؟!
