بعد طلاقى
قدامك حل من اتنين يا كريم: يا إما تنزل دلوقتي وتجيبلي أصول التنازلات والشيكات، وتعملي التنازل البنكي المعتمد إلكترونياً قدامي هنا في العربية، يا إما الباب مقفول بالسنتر، والمشوار ده هينتهي قدام مبنى الأموال العامة، وساعتها مش هتلحق حتى تكلم فوزي، وداليا هتكون أول واحدة تسلمك علشان تنجد نفسها. مسك راسه بإيديه، وكان بيتنفس بصوت عالي كأنه بيحتضر، وفجأة موبايله اللي مرمي على الأرضية نور ورن من تاني.
الاسم اللي ظهر على الشاشة كان: “داليا”.بصيت للموبايل، وبصيت لكريم، وقولتله بهدوء:— رد عليها يا كريم. .. وافتح الاسبيكر. وخلينا نشوف مين فيكم هيبيع التاني الأول. رنين الموبايل على أرضية العربية كان كأنه جرس إنذار بيعلن بداية الانهيار الحقيقي. كريم وطى بضهر محني وإيدين بتترعش، مسك التليفون وعينيه متعلقة بوشي في المراية، كأنه تلميذ مستني الإذن من أستاذه.
شاورتله براسي ناحية الشاشة ببرود:— افتح الاسبيكر يا كريم… ومتخليهاش تحس بأي حاجة، عايزة أسمع كل كلمة. ضغط على زر الرد بإيد مبلولة عرق، وفتح مكبر الصوت. صوت داليا طلع عالي، حاد، ومفيش فيه ذرة من الدلع أو الرقة اللي كانت بتتصنعهم زمان:— إنت فين يا كريم؟! مبتردش ليه من الصبح؟ أنا وصلت الشقة ولقيت البواب بيقولي إن فيه اتنين شكلهم غريب كانوا بيسألوا عنك وعن عربيتك العصر! قولتلك من الأول الغبية دي مش هتسكت، وأنت قعدت تقولي عاطفية وهتنسى ومش فاهمة حاجة!
أشكالهم مباحث أو تحريات أموال عامة، أنا عارفاهم كويس! اسمعني كويس يا كريم، الشيكات والورق اللي معايا مش هيفضلوا في الخزنة هنا، أنا نازلة بيهم دلوقتي ورايحة على المطار، حجزت على أول طيارة لبيروت ومنها لدبي، وأنت تصرف مع مصيبتك! الحساب اللي بره نصيبي فيه مضمون، ولو حاولت تلعب بديلك أو تتهرب، أقسم بالله الورق الأصلي اللي يوديك في ستين داهية هيكون على مكتب رئيس النيابة الصبح قبل ما طيارتي تلمس الأرض!
كريم اتجمد مكانه، وعينيه جحظت من الصدمة. الراجل اللي ضحى بـ 12 سنة جواز وخسر مراته ودمر بيتها علشانها، كان بيسمعها دلوقتي وهي بترميه للكلاب في أول اختبار حقيقي، وبتستعد تهرب بالملايين وتسيبه يشيل الليلة لوحده. بصيتله في المراية وابتسمت ابتسامة سخرية، وهمستله بشفايفي من غير صوت: “رد عليها”.كريم اتكلم وصوته مشروخ:— داليا… أنتي بتهدديني؟
