بعد طلاقى
كريم صرخ وهو بيشاور بإيده:— هي دي! دي داليا! الشنطة اللي في حضنها فيها اللاب توب والورق الأصلي والشيكات وكل التوكيلات! أرجوكي يا ريم، متخليهاش تعدي البوابة بتاعة الكارتة!ابتسمت، وعدلت مسار العربية وقطعت الطريق بمهارة قدام التاكسي قبل ما يوصل للمحور الرئيسي، وأجبرت السواق إنه يدوس فرامل مفاجئة وقفت العربية بالعرض في نص الشارع المظلم.
داليا اتخبطت في الكرسي اللي قدامها من الفرملة، ورفعت راسها بغضب وفتحت الشباك علشان تزعق، لكن في اللحظة دي، نور عربيتي العالي ضرب في وشها مباشرة، والباب الخلفي لعربيتي اتفتح، ونزل منه كريم وهو بيجري عليها زي المجنون، بينما أنا فضلت قاعدة ورا الدركسيون، حاطة إيدي على الموبايل اللي كان بيتصل برقم جهة تانية خالص مكنتش داليا ولا كريم يتخيلوا إنها مستنياهم على أول الطريق. نور الكشافات العالي كان مسلّط على وش داليا، ملامحها اتغيرت من الغضب للرعب الصافي لما شافت كريم بيهجم على باب التاكسي، بيفتحه بقوة وبيشد الشنطة الجلد من حضنها بهستيريا:— انزلي يا خاينة!
فاكرة إنك هتهربي بالورق والفلوس وتلبسيني الليلة لوحدي؟! انزلي!داليا كانت بتصرخ وهي متبتة في يد الشنطة بكل قوتها:— سيب الشنطة يا كريم! إنت اتجننت؟! الشنطة دي فيها حياتي ومستقبلي! سيبها وإلا هبلغ عنك دلوقتي حالاً!— تبلغي عن مين يا حرامية؟! أنتي اللي زورتي وأنتي اللي خططتي!سواق التاكسي نزل مرعوب وهو بيحاول يفض الخناقة، والشارع كله بقى مسرح لفضيحة علنية تحت المطر الغزير. الاتنين اللي اتآمروا عليا زمان وباعوا عشرة 12 سنة بدم بارد، كانوا بيتقطعوا قدامي في الطين علشان شوية ورق وفلوس مسروقة. فتحت باب عربيتي ونزلت ببطء.
كنت لابسة البالطو الأسود، والكاب والنضارة شيلتهم خلاص، سايبة المطر يغسل وشي وشعري القصير. وقفت على بعد خطوات منهم، وحطيت إيدي في جيبي. أول ما داليا شافتني جاية من ورا نور العربية، صوتها قطع فجأة. إيدها سابت الشنطة ببطء من هول الصدمة. عينيها وسعت، وبصت لكريم وبعدين بصتلي، ورجعت خطوة لورا وهي بتهمس بعدم تصديق:— ر… ريم؟!كريم شد الشنطة وحضنها كأنه كسب المعركة، ولف وشه ليا وهو بينهج، وابتسم بانتصار أعمى وقالي:— أهي الشنطة يا ريم! الورق كله هنا، الشيكات والتوكيلات المزورة والأصول! أنا جبتلك حقك منها، داليا مش هتعرف تلمس قرش واحد، وإحنا…
